Arkimed Lusha, reperi i njohur edhe emrin Stresi, u ul dje në bankën e të akuzuarve në Gjykatën për Krimet e Rënda. Por gjykata nuk mundi ta nisë gjykimin ndaj tij dhe katër të bashkëpandehurve të tij, të akuzuar për “gjobëvënie” ndaj regjisorit Leonard Bombaj. Seanca, e cila ishte e para në radhë e këtij procesi, u ndërpre brenda pak minutash për shkak të mungesës së të pandehurit Sebastian Kallabaku, i cili nuk kishte as avokat.
Gjykata shtyu procesin për të lajmëruar të pandehurin Kallabaku dhe njëkohësisht edhe të pandehurën A. Xh., ish-studenten e regjisorit Bombaj. Kur trupa gjykuese e kësaj dosjeje u fut dje në sallën e gjyqit, në bankën e të akuzuarve ndodheshin vetëm tre nga të pandehurit. I veshur me rroba të gjera, në stilin tipik të një reperi, Arkimd Lushaj ishte një prej tyre, i ulur pranë avokatit të tij. Në vijim, me qetësi ai konfirmoi para gjykatës gjeneralitetet e tij. Të njëjtën gjë bënë në vijim edhe dy të pandehurit e tjerë të pranishëm, Relado Kurti dhe Elis Bashaj. Për të pandehurën A. Xh. në seancë ishte i pranishëm avokati i saj mbrojtës, i cili pretendoi se kishte një prokurë të posaçme, sipas së cilës mund ta përfaqësonte klientin e tij në mungesë. “Klientja ime nuk ka dëshirë të paraqitet në proces”, u shpreh avokati.
Nga ana e tij, përfaqësuesi i akuzës në proces, prokurori Ardian Nezha, i kërkoi trupës gjykuese të ripërsëriste njoftimet për të pandehurin e paparaqitur Kallabaku dhe për të pandehurën A. Xh. “Sebastian Kallabaku nuk është njoftuar konform normave procedurale. Kjo pasi i pandehuri Kallabaku nuk është vendosur në dispozicion të Drejtësisë as gjatë fazës së hetimeve”, u shpreh prokurori.
Në lidhje me të pandehurën A. Xh., prokurori pretendoi se të paktën në seancën e parë ajo duhej të paraqitej në gjykatë, ku edhe të shprehë vullnetin e saj për t’u përfaqësuar në mungesë nga avokati. Në përfundim, trupa gjykuese vendosi ndërprerjen e seancës për njoftimin e të pandehurve Kallbaku dhe A. Xh. Të pandehurit e kësaj dosjeje akuzohen nga prokuroria për akuzën e “shtrëngimit me anë të kanosjes për dhënien e pasurisë” në dëm të regjisorit Leonard Bombaj. Historia e tyre nisi me disa kallëzime të ndërsjella në polici mes A. Xh. dhe regjisorit Bombaj, ku e para pretendonte se ishte përdhunuar, ndërsa regjisori pretendonte se ishte kërcënuar dhe shantazhuar. Te Krimet e Rënda të pandehurit e kësaj dosjeje do të gjykohen në gjendje të lirë.