Takim Rama-Topalli, batuta pë integrimin dhe për… gratë

Pas batutave në distancë, Edi Rama dhe Jozefina Topalli janë takuar dje ballë për ballë duke shkëmbyer batuta kundrejt njëri-tjetrit, por në fund kanë pranuar edhe të shtrëngojnë duart. Takimi midis dy politikanëve ka ndodhur në konferencën e organizuara nga OSBE me temë “Rritja e Rolit të Gruas në qeverisje: Premtim i mbajtur?”. Ky shtrëngim duarsh mes Ramës dhe Topallit është i rrallë në historinë e politikës shqiptare.

Takimi ishte lajmëruar që të niste në orën 12:00. Kryetari i PS-së, Edi Rama dhe kreu i OSBE-së, Eugen Volfarth mbërritën pak minuta përpara, por u detyruan që të prisnin pjesëmarrësit e tjerë që konferenca të niste punimet. Pasi kaluan disa minuta përtej orarit që ishte parashikuar, kryetari i PS-së ka hedhur sytë nga ambasadori i OSBE-së për të nënkuptuar se pse takimi s’po nis. Ky i fundit i ka kërkuar kryesocialisti që të presin dhe pak. “Kur pret ti qe je gjerman, unë në rregull jam”,- ka replikuar Rama duke iu referuar mungesës së Topallit.

Më tej, punonjësja e protokollit të prezencës së OSBE-ODHIR, e cila merrej dhe me organizimin e konferencës, iu është afruar Edi Ramës dhe Eugen Volfarth për t’i kërkuar që të prisnin 2-3 minuta dhe më pas të fillonte aktiviteti, pasi mungonte kryetarja e Kuvendit, Jozefina Topalli, e cila ishte duke ardhur. Pas këtij lajmërimi, duke buzëqeshur Rama tha se “po si e ka 2-3 minuta ajo, me të reja apo me të vjetra…”. Ndihmësja e ka kreut të OSBE-së e përktheu këtë batutë dhe kërkoi mirëkuptimin e kreut të opozitës për të pritur pak më shumë, pasi sipas tij, “gratë duheshin respektuar”. Por, kreu i selisë rozë nuk e ka lënë me kaq këtë bisedë, madje ai ka këmbëngulur sërish përmes batutave të tij, por këtë herë duke ngritur pak tonalitetin e zërit dhe duke iu drejtuar garave të pranishme me fjalët: “Po këto në sallë çfarë janë…”. Kjo batutë e Ramës shkaktoi të qeshura në sallë.

Pasi kishin kaluar rreth 30 minuta, kryetarja e Kuvendit i është afruar panelit të të ftuarve dhe i ka zgjatur dorën kryetarit të Partisë Socialiste, Edi Rama. Ky i fundit, gjatë shtrëngimit të duarve, ka preferuar që ta presë me një batutë kryeparlamentaren duke iu drejtuar me fjalët: “He moj Jozefinë, kush e vonon integrimin tani”. Jozefina Topalli nisi të qeshë dhe iu përgjigj kryetarit të opozitës duke thënë: “Ti, ti”.

Dy politikanët, të cilët ditët e fundit kanë shkëmbyer replika në distancë, nuk kanë diskutuar gjë tjetër midis tyre. Në panelin e të ftuarve ishte i pranishëm dhe kryetari i Lëvizjes Socialiste për Integrim, Ilir Meta. Midis Metës dhe Ramës nuk ka pasur ndonjë kontakt apo përplasje gjatë momentit të zhvillimit të konferencës së organizuar nga prezenca e OSBE-së.

Batutat e shkëmbyera me Eugen Volfarth dhe me Jozefina Topallin, nuk kanë qenë të vetmet nga Edi Rama. Kryetari i Partisë Socialiste ka pasur një tjetër shkëmbim fjalësh me një tjetër të pranishëm, me ministrin e Punëve Çështjeve Sociale dhe Shanseve të Barabarta, Spiro Ksera. Ministri i qeverisë Berisha, i cili është anëtar i shoqatës së minoriteve grek OMONIA, është përshëndetur nga lideri i socialistëve në greqisht. “Ti kanis”,- është shprehur Rama duke buzëqeshur, ndërsa Ksera i është përgjigjur në të njëjtën gjuhë me fjalët: “kala, kala”. Batutat midis politikanëve u shkëmbyen gjatë takimit në organizuar në një holeve të njohura në Tiranë, në kuadër të konferencë dyditore të organizuar nga OSBE-ja për rritjen e rolit të grave në qeverisje.





Rama dhe Meta shmangin kontaktet me njëri-tjetrin

Teksa Edi Rama pranoi që të takohet me Jozefina Topallin, e njëjta gjë nuk ndodhi me Ilir Metën. Edhe pse kanë qëndruar për më shumë se 10 minuta në të njëjtën sallë duke pritur të niste takimi, Rama dhe meta nuk i janë afruar njëri-tjetrit. Ata ishin ulur në reshtin e parë, por mes tyre ndodheshin disa gra të ulura. Në pjesën më të madhe të kohës si Rama, ashtu edhe Meta kanë mbajtur kokën në krahun tjetër. Edhe në podium, Rama e Meta kanë qëndruar në skajet e tavolinës dhe në asnjë rast nuk kanë folur me njëri-tjetrin.





Batutat Rama-Volfarth-Topalli në në konferencën për rritjen e rolit të gruas në qeverisje

(Ambasadori i OSBE-së dhe kryetari i PS-së u ulën në tryezë dhe pritën mbërritjen e kryetares së Kuvendit që të fillonte takimi).

Eugen Volfarth: Ju lutem, presim pak z. Rama

Edi Rama: Kur pret ti qe je gjerman, unë në rregull jam.

(Dy personaliteteve i afrohet punonjësja e protokollit e OSBE-së)

Punonjësja e OSBE: Të presim 2-3 minuta…

(Kryetari i PS-së u drejtohet të pranishmeve ngjitur tij…)

Edi Rama: Po si e ka 2-3 minuta me të reja apo me të vjetra…

(Ndihmësja e kreut të OSBE ia përkthen batutën në anglisht)

Eugen Volfarth: Le t’i presim gratë se duhen respektuar.

(Kreu i opozitës qesh dhe replikon sërish)

Edi Rama: Po këto në sallë çfarë janë…

(Gratë e pranishme në këtë aktivitet qeshin. Më pas tryezës i afrohet kryetarja e Kuvendit dhe i jep dorën kryesocialistit)

Edi Rama: He moj Jozefinë, kush e vonon integrimin tani.

(Kryeparlamentarja replikon duke qeshur)

Jozefina Topalli: Ti, ti.

* * *

(Gjatë momentit që kryesocialisti ishte ulur në tryezë, vjen edhe ministri i Punës dhe Shanseve të Barabarta, Sprio Ksera, i cili përshëndetet me kreun e PS-së).

Edi Rama: Ti kanis (Përshëndetje në greqisht)

Spiro Ksera: Kala, kala.





Eugen Vollfarth, kreu i OSBE-së

“Gratë vazhdojnë të jenë të nënpërfaqësuara në politikë. Tepër gra të forta, të afta dhe energjike vazhdojnë të jenë të përjashtuara nga postet e zgjedhura. Partitë politike duhet të bëjnë më shumë në lidhje me respektimin e kuotës gjinore dhe të vendosin emrat e kandidateve gra në mënyrë më të spikatur në të gjitha listat zgjedhore”.



Edi Rama, kryetari i PS-së

“Futja e kuotës në listat e zgjedhjeve politike ishte një hap i domosdoshëm, megjithëse në pikëpamjen time dhe në pikëpamjen tonë të PS do të duhej një formulë e ndryshme, do të duhej një kuotë horizontale, jo vertikale. Çka do të thotë se në rast se çdo parti politike merr përsipër, e detyruar edhe nga ligji, një pjesëmarrje 30% të grave, kjo do të duhej të ishte në linjën horizontale”.



Jozefina Topalli, kryetare e Kuvendit

“Ka një kontradiksion të madh midis asaj që themi dhe asaj që shohim. Ka një kontradiksion të madh për faktin se çështja e fuqizimit të gruas nuk është vetëm një çështje kombëtare, por është çështje globale. Është një çështje që trajtohet në çdo shoqëri, pavarësisht nga historia që ato kanë pasur. Dhe në shumicën e rasteve e kanë pasur histori më të lumtur se historinë tonë”.



Rama-Topalli përplasen edhe me fjalime

Krahas batutave të shkëmbyera përpara nisjes së konferencës së organizuara nga OSBE, kryetari i Partisë Socialiste, Edi Rama dhe kryeparlamentarja Jozefina Topalli janë përplasur midis tyre përmes rreshtave në fjalimet e tyre. Fillimisht ka qenë kryetarja e Kuvendit që ka thënë: Diferenca midis burrit dhe gruas është se gruaja është krijuese, burrat zakonisht janë më shkatërrues. Gruaja di të marrë përgjegjësi ashtu si i merr në familje. Gruaja di si drejtohet familja. Gruaja di se si rregullohen punët e shtëpisë. Gruaja di se si ruhen ekuilibrat brenda familjes. Po ashtu gruaja di të rregullojë punët e shtetit, punët e shoqërisë. Ne gratë shohim me optimizëm”, – është shprehur Topalli gjatë takimit. Për këtë pjesë fjalimit kryesocialisti ka bërë një koment në fund të fjalimit të tij. “Më lejoni që t’i vë pikën duke thënë; Jam absolutisht dakord me atë që tha Jozefina që gruaja është krijuese. Po burrin mos ta quajmë shkatërrues, por ta quajmë bashkautor të paktën. Pastaj që ka dhe burra shkatërrues kjo është jashtë çdo dyshimi. Dhe pikërisht pse ka burra shkatërrues duhet të ketë shumë më tepër gra krijuese edhe në politikë”,- ka replikuar Rama.