Valentina Madani
Një ditë pas publikim it të progres-raportit të Komisionit Europian, palët kanë vijuar akuzat e ashpra mes tyre pavarësisht se fryma e bashkëpunimit mes mazho-rancës dhe opozitës ishte rekomandimi kryesor për marrjen e statusit të vendit kandidat. Në fjalën e tij në Kuvend, kryeministri, Sali Berisha fajësoi socialistët për bllokimin e integrimit të vendit. Madje sipas tij dëmin që opozita i ka sjellë Shqipërisë nuk ia kanë bërë as pushtuesit më të egër të saj. “Shqiptarë, këta zotërinj nuk kanë bllokuar vetëm ligjet me 3/5, por kanë votuar kundër të gjitha ligjeve. Bllokimi i vizave do mbetet përpjekja e tyre më diabolike. Një ditë, në tempullin e Brukselit, një personalitet i shquar do të më thoshte: mirë ai, zotëri (Edi Rama), se është kaq antishqiptar, po ata që e ndjekin në këtë mënyrë, çfarë janë. Përgjigja ime ishte se edhe ai, edhe ata janë shqiptarë, sepse atë që i kanë bërë shqiptarët, Shqipërisë, nuk ia ka bërë asnjë barbar. Atë që i ka bërë Enver Hoxha, Shqipërisë, nuk ia kanë bërë të gjitha pushtimet. Atë që i kanë bërë Toptanët dhe Haxhiqamilët, Shqipërisë, nuk ia kanë bërë të gjithë okupatorët. Atë që i kanë bërë shqiptarët, Shqipërisë, nuk ia ka bërë kurrkush. Kur unë u deklarova një herë, se këta jemi ne, shqiptarët, me këtë desha të them se unë nuk ju përjashtoj dot, ju jeni shqiptarë, jeni pjesë e këtij vendi”, deklaroi Berisha. Mandej kryeministri filloi të rendiste arritjet e qeverisë së tij, por përpjekjet e deputetit socialist, Saimir Tahiri për t’i ndërprerë fjalën e kanë nervozuar. “Ty që flet nga vendi mund të ta bëj fytyrën më të zezë se këpucët e tua nga fëmijëria jote deri më sot. Ti e di mirë që unë të njoh mirë ty, si je rrit, ku je rrit, cilën ke pas dhe cila është pasaporta jote. Këto i di ti në mos shko e pyet pak. Në këta deputetë për fatin tënd të keq ti je ai që ka rasit për një rrethanë të caktuar të të njoh më mirë në çdo etapë të jetës tënde”, iu drejtua Berisha, deputetit socialist. Vetë Tahiri nuk ka preferuar të reagojë nga Kuvendi për këto akuza të ashpra të bëra në adresë të tij. Por në një prononcim për “Gazeta Shqiptare”, Tahiri tha se “thjesht më vjen turp për këtë që na ka rënë për hise ta kemi kryeministër”. Ndërkohë në fjalën e tij, shefi i ekzekutivit nuk harroi pa thumbuar edhe Presidentin e Republikës, Bamir Topi duke iu “sugjeruar” socialistëve të mos bëhen zëdhënës të tij. “Nëse doni të bëheni zëdhënës të Presidentit, bëhuni, por ne jemi shumica sovrane e popullit shqiptar dhe do t’i përmbahemi sovranitetit. Ju vazhdoni ashtu si të doni. Ne nuk ju diktojmë asgjë. Kjo është oferta jonë”, tha Berisha. Kryeministri shprehu mandej gadishmërinë se është dakord për të nisur reformën zgjedhore dhe reformën parlamentare, por nuk do të lejojë atë që ai e quajti dhunim të parlamentarizmit. “Ofroj konsensus të plotë për reformën, nëse nuk doni, hartoni të gjitha amendamentet i dërgoni në OSBE/ODIHR e ne do i votojmë. Që nesër të ulemi të shqyrtojmë rregulloren e parlamentit, të marrim rregulloren e parlamentit europian. Por doni rregulla për të dhunuar parlamentarizmin nuk mund të ndodhë”, përfundoi Berisha.
DEKLARATAT MË TË
FORTA TË BERISHËS
- Atë që i kanë bërë Toptanët, Shqipërisë, nuk ia kanë bërë të gjithë okupatorët
- Për Saimir Tahirin
Mund të ta bëj fytyrën më të zezë se këpucët e tua nga fëmijëria jote deri më sot. Ti e di mirë që unë të njoh mirë ty, si je rrit, ku je rrit, cilën ke pas dhe cila është pasaporta jote.