Alban Skënderaj, Juliana Pasha dhe Pandi Laço bashkë në një panel

Alban Skënderaj, Juliana Pasha dhe Pandi Laço janë tre emrat e vendosur deri tani për t’u bërë trajnerët e talenteve, që do të zbulohen në spektaklin “X Factor Albania”, që pritet të nisë transmetimin në muajin janar. Paneli përbëhet nga katër persona, por deri tani është rënë dakord vetëm për Skendërajn, Pashën, dhe Laçon, i cili ndërkohë prezanton dhe spektaklin “100 këngët e botës”. Spektakli do të nisë në fillim të janarit për të vazhduar deri në qershor, që korrenspondon dhe me mbylljen e sezonit televiziv. Spektakli me producente Vera Grabockën dhe Alketa Vejsiun është parashikuar të nisë me pesë spektakle të konceptuara nga audicionet nëpër rrethe me të rinjtë, për të vazhduar me 16 net finale e për të mbërritur te nata e fundit, ku do të debutojnë 12 finalistë.

Vera Grabocka dhe Alketa Vejsiu rikthehen sërish bashkë në një projekt të ri televiziv në “Tv Klan”. Pas shkëputjes së bashkëpunimit në edicionin e dytë të “Dancing with the stars”, për shkak të shtatzënisë së dytë të Alketës, përgatiten për një tjetër program në një tjetër ekran. Kanë lënë pas një verë të gjatë dhe sapo janë kthyer në Shqipëri për kërkimin e talenteve në gjithë Shqipërinë, për programin botëror “X-Factor Albania”. Vera Grabocka dhe Alketa Vejsiu vijnë si producente artistike, të talent/show-t “X Factor Albania”, që realizohet si produksion i “TV Klan”, ku Grabocka do të jetë edhe regjisore e spektaklit, ndërsa Vejsiu prezantuese e tij.