Nju-Jork, 11.11.2011 11:44
Pasi ditë më parë ka shokuar publikun me pranimin se dhjetë ditë para revysë së “Victoria’s Secret”, e cila mbahet (në të vërtetë është mbajtur mbrëmë, e enjte 10 nëntor) në Nju-Jork, ajo thjesht nuk konsumon asgjë, Adriana Lima ka përgatitur edhe një befasi tjetër për fansat e saj.
Në të vërtetë, paparacët e kanë fotografuar duke e lëshuar një klinikë të kirurgjisë estetike. Duket se bukuroshja braziliane ka vendosur që çdo gjë të jetë perfekt dhe ajo të martën në mëngjes është parë me nguti duke lëshuar një klinikë për operime plastike në Nju Jork.
Pasi kjo klinikë është e specializuar për përmirësime në fytyrë, supozohet se Lima, e cila këtë verë ka mbushur 30 vjet, ka qenë në tretman të botoksit, për të hekurosur rrudhat para kësaj revyje të famshme, në të cilën ajo do të jetë njëra nga manekinet më të moshuara.
E ka thyer mitin e bukurisë natyrale
Siç ka deklaruar më herët, nëntë ditë para kësaj revyje, nuk konsumon ushqim, por pi vetëm pije me përzierje frutash, të cilat ia përgatisin ekspertët e ushqimit. Lima-n për shumë vite e ka përcjellë miti se është shembull i rrallë i bukurisë natyrale në botën e top-modeleve.
Por ky mit është rrënuar kur është mësuar se kjo bukuroshe gjoksin e saj e ka rritur me silikon. Më vonë ishte supozuar se ajo edhe ka bërë tërheqjen e fytyrës si dhe ka vendosur silikon në buzë, por fotot e saj nga fillimi i karrierës, kanë treguar se Adriana është e njëjta vajzë si në fillim të karrierës.
Mirëpo, e përballur me konkurrencë të fortë dhe bukuroshe më të reja në moshë, të cilat “Victoria’s Secret” i angazhon në numër më të madh, edhe Lima i është nënshtruar kërkesës së kësaj industrie për të mbajtur pamjen e vazhdueshme rinore.