Gazeta SHQIP - Aktualitet

Gazeta Shqip - Aktualitet

Mat, gruaja xheloze vret burrin me sëpatë

Megjithëse të ndarë, Lule Doçi nuk duroi dot martesën e ish-burrit me një 18-vjeçare

Krimi në familje shënon viktimën e radhës në Burrel. Një grua ka goditur për vdekje me sëpatë ish-bashkëshortin e saj për motive xhelozie. Lajmi bëhet i ditur zyrtarisht nga policia lokale, e cila ka saktësuar se ngjarja e rëndë ka ndodhur në fshatin Karricë të Komunës së Bazit, në rrethin e Matit.

Sipas këtyre burimeve, mësohet se Lule Doçi, 40 vjeçe, ka goditur me sëpatë ish-bashkëshortin e saj Vladimir Doçi, duke i shkaktuar atij vdekjen e menjëhershme.

Ka qenë ora 23.00 e së hënës kur 40-vjeçarja Lule Doçi ka goditur në gjumë me sëpatë bashkëshortin, me të cilin kishte pak kohë që i kishte ndërprerë marrëdhëniet, por nuk ishte divorcuar ende ligjërisht.

Nga hetimet paraprake ka rezultuar se shkak i vrasjes ka qenë një konflikt i ashpër i zhvilluar midis ish-bashkëshortëve mbrëmjen e së hënës.

Mësohet se zënka ka nisur për shkak të xhelozisë së gruas për një 18-vjeçare, me të cilën ish-bashkëshorti i saj ishte martuar vetëm para pak ditëve.

Viktima Vladimir Doçi, 52 vjeç, babai i katër fëmijëve, dy prej të cilëve më të rritur se gruaja e tij e re dhe dy më të vegjël, kishte pak kohë që nuk jetonte me Lule Doçin, por çifti nuk kishte shkuar në gjykatë për të bërë shkurorëzimin.

Ndarja e kishte çuar 40-vjeçaren në një gjendje depresive shumë të rëndë, që është rënduar kur ajo ka marrë vesh lajmin se babai i fëmijëve të saj ishte martuar para pak ditëve me një vajzë vetëm 18 vjeçe.

Të hënën, kur edhe ndodhi ngjarja e rëndë, mësohet se viktima është rikthyer në shtëpi për të siguruar dru zjarri për dy fëmijët e vegjël. Mendohet që në mbrëmjen e kësaj dite ajo është përfshirë në një konflikt të ashpër me ish-bashkëshortin për martesën e re.

Dyshohet se disa orë pas grindjes, kur burri kishte rënë për të fjetur, Lule Doçi ka rrëmbyer një sëpatë në oborrin e shtëpisë dhe e ka sulmuar ish-bashkëshortin në gjumë, duke e lënë të vdekur në shtrat.

Policia ka shkuar menjëherë në vendngjarje, ku ka ndaluar autoren e vrasjes, si dhe ka nisur hetimet për zbardhjen e kësaj ngjarjeje. Po sipas burimeve nga policia, mësohet se skena e krimit do të zbardhet plotësisht vetëm pas marrjes në pyetje të gruas 40-vjeçare. Deri në orët e vona të pasdites së djeshme, ajo nuk ka dhënë asnjë detaj, për shkak të gjendjes së rënduar depresive në të cilën është futur pas kryerjes së krimit.

Antidroga, prangosen katër veta në Elbasan dhe Vlorë

Aksionet

Kapen dy shpërndarës me 20 doza heroinë dhe dy “prodhues” me 21 kilogramë marijuanë

Dy operacione të ndryshme policore të zhvilluara në Vlorë dhe Elbasan kanë bërë të mundur sekuestrimin e 21 kg kanabis dhe 27 dozave heroinë, ndërkohë që janë prangosur katër persona.

Elbasan

Operacioni i koduar “Emigranti” është finalizuar me prangosjen e dy të rinjve elbasanas, të cilët akuzohen se kanë shpërndarë lëndë narkotike. Burimet zyrtare deklaruan se në pranga janë vënë Olsi Bardhi, 22 vjeç, lindur e banues në lagjen “Beqir Dardha” dhe Jordhan Saripanidhis, 20 vjeç, lindur e banues në lagjen “Emin Matraxhiu” të Elbasanit. Të njëjtat burime saktësuan se të rinjtë janë kapur në flagrancë në një prej lagjeve të qytetit, gjatë kohës që ata kanë nisur tregtimin e drogës. Menjëherë pas marrjes së informacionit, për të rinjtë që posedonin lëndë narkotike, policia është nisur në vendin e ngjarjes duke ushtruar kontroll mbi të akuzuarit. Gjatë kontrollit fizik, të arrestuarve iu gjetën njëzet e shtatë doza lëndë narkotike e dyshuar si heroinë. Zyrtarisht konfirmohet se ndaj të rinjve rëndon akuza e “prodhimit dhe shitja e lëndës narkotikëve”.

Vlorë

Polica e Vlorës ka arrestuar dy persona për posedim të lëndës narkotike. Burimet zyrtare deklaruan se rreth orës 06.30 të së martës, pas një pune hetimore 1-javore, është finalizuar operacioni i koduar “Armeni”. Në kuadër të këtij operacioni është bërë ndalimi i 29-vjeçarit Vullnet Nuredinaj, banues në fshatin Armen, pasi i është gjetur në banesë një sasi prej 17.1 kilogramësh lëndë narkotike, e ngjashme me atë të llojit marijuanë, e cila ishte e vendosur në tri çanta të ndryshme. Mësohet se 29-vjeçari është me precedentë penalë, pasi ka qenë i dënuar më parë për vjedhje. Ndërkohë, po dje, është ndaluar edhe Vezir Nuredinaj, 47 vjeç, pasi në banesën e tij janë gjetur dhe sekuestruar në cilësinë e provës materiale një sasi prej 4 kilogramësh marijuanë, e cila ishte e vendosur në dy qese plastmasi. Burimet zyrtare të policisë kanë deklaruar se Nuredinaj ka qenë i dënuar më parë për veprën penale “trafikim i lëndëve narkotike”. Materialet procedurale i janë referuar Prokurorisë së Rrethit Gjyqësor Vlorë për hetime të mëtejshme për veprën penale “prodhimi dhe shitja e narkotikëve”.

Vazhdon bojkoti i shkollës për hekur-nikelin

Kukës

Banorët e lagjes Neçe në fshatin Mamëz, nuk i kanë dërguar sërish fëmijët në shkollë, në shenjë proteste ndaj firmës që punon për nxjerrjen e mineralit të hekur-nikelit. Një kryefamiljar pohoi se derisa të nisin negociatat për gjetjen e zgjidhjes, fëmijët do të bojkotojnë mësimin, pavarësisht se dy ditë më parë Drejtoria Arsimore ka kërkuar rikthimin e tyre në bankat e shkollës. Banorët nuk harrojnë të kujtojnë se shkaku i kësaj mase ekstreme është indiferenca e qeverisë për çështjen e tyre. “Qeveria bën një vesh shurdh në rastin e fshatit tonë, segmente të saj janë ndoshta të lidhur me firmën private, prandaj në vend që të dërgojë një negociator dërgon vetëm policë”, tha një banor i lagjes. Në peticionin e dërguar krerëve të shtetit dhe drejtuesve rajonalë të pushtetit, ata theksojnë faktin se “një firmë private, e cila shfrytëzon mineralin e hekur-nikelit në fshat, rrezikon fëmijët në rrugët e ngushta të fshatit me automjetet e rënda, ndërsa, nga ana tjetër, gërmimet po prishin gjithçka nga kullotat, mali dhe bimësia”. Nga ana e saj, Drejtoria Rajonale e Arsimit u ka bërë thirrje banorëve të çojnë fëmijët në shkollë, pavarësisht problemeve me firmën e hekur-nikelit. Drejtori i arsimit, Ylli Metalia, duke mirëkuptuar komunitetin e fshatit ka premtuar se ditët e humbura do të zëvendësohen, por me kusht që bojkoti të mos vazhdojë më. Banorët thonë se janë pronarë të ligjshëm të truallit ku nxirret minerali dhe kërkojnë pezullimin e punës, por firma private ndërkohë punon pa telashe nën “mbikëqyrjen” e policisë dhe grumbullon qindra dhe mijëra tonë hekur-nikeli përbri autostradës. Në Mamëz problemet nisën dy javë më parë, kur Policia e Shtetit dërgoi atje forcat e ndërhyrjes së shpejtë, të cilët u ballafaquan me dhjetëra banorë dhe ku situata u afrua shumë afër përplasjes fizike. Forcat speciale u dërguan nga Shkodra dhe qëndruan në fshat derisa liruan frontin e punës për një kompani private, ndërsa vazhdojnë të qëndrojnë efektivë të policisë lokale.

BE: Gati të ofrojmë ekspertizë për videon “Meta-Prifti”

Deklarata

Bashkimi Europian shprehet i gatshëm që të ofrojë ekspertizë për video-përgjimin “Meta-Prifti”, nëse këtë e kërkojnë autoritetet shqiptare. Zëdhënësi i Stefan Fyles deklaron për ‘Top Channel’ se, Komisioni vëren progres të vogël në dënimin e korrupsionit të të gjitha niveleve dhe ky sipas tij, është prioritet kyç për Shqipërinë. Peter Stano, Zëdhënës i KE-së për Zgjerimin është shprehur se: Ajo që duhet theksuar është se në merremi me sistemin e drejtësisë shqiptare, e madje në raportin e fundit të progresit mbi Shqipërinë, me lejoni ta citoj, në vërejtëm progres shumë të vogël në dhënien e provave të forta për hetimin pro-aktiv, ndjekjen dhe dënimin e rasteve të korrupsionit në të gjitha nivelet, çfarë përbën një prioritet kyç për Shqipërinë. E në këtë aspekt, Komisioni pret që sistemi shqiptar të veprojë në mënyrë tërësisht të pavarur dhe në një mjedis të paanshëm. Kjo do të thotë se ne presim që gjyqësori të kërkojë ekspertizën e nivelit më të lartë të mundshëm dhe nëse ekziston nevoja, ne presim që gjyqësori, në kuadër të bashkëpunimit legal me partnerët ndërkombëtarë, të kërkojë këshilla në nivel ndërkombëtar me partnerët jashtë vendit.

Godet me kazmë gruan dhe të moshuarin, dyshonte se ata kishin lidhje intime

Itali

Policia arreston agresorin 59-vjeçar nga Shqipëria, ndërsa dy të plagosurit ndodhen në spital

Një emigrant shqiptar ka goditur me kazmë të shoqen dhe një të moshuar 77-vjeçar, për të cilin e shoqja kujdesej, pasi dyshonte se kishte një lidhje mes tyre. Ngjarja në fjalë ka ndodhur dy net më parë, në një provincë të Romës, ku policia arrestoi në flagrancë për krimin një shqiptar të moshës 59-vjeçare, duke e akuzuar për tentativë vrasjeje dhe dëme ndaj pronës së 77-vjeçarit, për të cilin e shoqja punonte si kujdestare. 59-vjeçari, i bindur se mes të shoqes dhe të moshuarit kishte diçka më tepër se thjesht një raport pune, rreth orës 22.00 të mbrëmjes së djeshme u afrua në banesën e të moshuarit dhe nisi sulmin. I përfshirë nga xhelozia, shqiptari u sul mes disa mjeteve të punës ku rrëmbeu një kazmë, me të cilën, i verbuar nga xhelozia nisi të godasë të shoqen dhe të moshuarin. Ai që u dëmtua më keq nga ky sulm ishte 77-vjeçari, i cili përveç dëmtimeve në trup, goditjen më të fuqishme dhe të plotë e kishte pësuar në kokë. Fatmirësisht gruaja pësoi vetëm disa fraktura dhe nxirje të lehta, pasi teksa i shoqi ishte drejtuar për të goditur atë, pjesa metalike e kazmës ishte shkëputur nga pjesa e drurit duke evituar goditjet fatale. 77-vjeçari ndodhet i shtruar në spital si rrjedhojë e goditjes së marrë në ballë, e cila i ka dëmtuar në thellësi pjesën e majtë të kokës, ndërsa për gruan thuhet se do të dalë nga spitali brenda 10 ditësh. Ngjarja në fjalë ndodhi në zonën e Nettunos, në Romë, ku karabinierët ndërhynë menjëherë, ndërsa agresori kishte tentuar arratinë. Sipas policisë, thuhet se për shkak të xhelozisë, i shoqi kishte kërcënuar në vijimësi gruan që të linte punën. Shqiptari u arrestua vetëm pak çaste pas ngjarjes, ndonëse policia ndeshi në rezistencën e tij. Ai u transferua në burgun e Velletri, ku pritet të qëndrojë deri sa t’i jepet dënimi.

Vjedhja e gjykatës, për garën e kryetarit
2011-11-10

Deda: Është sabotim. Ministria e Drejtësisë, verifikim detyrave të kancelarit dhe magazinieres

Vjedhja e Gjykatës së Krimeve të Rënda është bërë për të sabotuar punën, në prag të zgjedhjes së kryetarit të ri në këtë institucion. Kështu ka deklaruar dje kryetarja e komanduar e gjykatës, Etleva Deda, duke pohuar se vjedhja është kryer nga një punonjës i brendshëm, pasi në godinën e gjykatës janë të instaluara të gjitha mjetet e sigurisë. Ndërkohë, Prokuroria e Tiranës thotë se ka filluar një hetim të plotë për këtë rast, duke marrë në pyetje punonjësit e gjykatës, si dhe duke sekuestruar kasetat me filmime në këtë institucion. Megjithatë, ajo që vihet re është se në dhomën e provave në Gjykatën e Krimeve të Rënda nuk ka pasur të instaluar kamera të sigurisë, por vetëm në gjykatë. Prokuroria do të monitorojë të gjitha hyrjet në këtë dhomë sigurie dhe më pas do të fillojë të marrë në pyetje punonjësit. Paraprakisht, ka dyshime se një punonjës është futur në këtë ambient, duke përdorur çelësin universal të gjykatës. Paralelisht me prokurorinë, Ministria e Drejtësisë njoftoi dje se ka filluar një inspektim në këtë gjykatë, për të gjetur “fajtorin” e kësaj vjedhjeje, që më shumë ka vënë në dyshim masat e sigurisë në gjykatë, pasi materialet e vjedhura nuk kishin ndonjë vlerë të madhe.

Hetimi dhe inspektimi

Nga hetimet e deritanishme është zbuluar se një punonjës i Gjykatës së Krimeve të Rënda ka vjedhur 50 mijë lekë dhe 300 euro në dhomën e provave. Pavarësisht se në dhomë ndodhen të sekuestruara prova materiale me vlera të konsiderueshme, si një unazë me diamant, ora “Rolex”, armë, lëndë narkotike dhe shuma të mëdha lekë, euro dhe dollar, një person, që dyshohet se është punonjës i brendshëm i Gjykatës, ka marrë 50 mijë lekë dhe 300 euro. Sipas burimeve të gjykatës, këto prova i përkisnin të pandehurit Arben Veliko, i cili akuzohet për trafik droge. Megjithatë, hetimet e deritanishme janë fokusuar te këqyrja e pamjeve filmike, pasi rezulton se autori ka mundur të lëvizë me kujdes, edhe pse kushtet e sigurisë në gjykatë janë të lartë. Ndërkohë, paralelisht me hetimet, Ministria e Drejtësisë ka dërguar në gjykatë dy inspektorë për verifikimet e mëtejshme. Ministria veproi pas ankesës së kryetares aktuale, Etleva Deda, drejtuar ministrit të Drejtësisë, e cila u ka pohuar se “i dyshuari kryesor ndodhet mes punonjësve të administratës së Gjykatës së Krimeve të Rënda”. Mësohet se sot, inspektorët e ministrisë do të bëjnë publike rezultatet e kontrollit, ku do të analizohet puna e kancelarit dhe magazinieres, nëse e kanë kryer ose jo detyrën. Megjithatë, burimet zyrtare nga Ministria e Drejtësisë pohojnë se do të merren masa administrative ndaj punonjësve të Gjykatës së Krimeve të Rënda, ku nuk përjashtohet as pezullimi apo shkarkimi nga detyra.

Kryetarja e komanduar

“Diçka është e sigurt, këtu ka roje te dera, ka kamera jashtë dhe brenda, ka karta për të hyrë, këtu është vënë rregull që asnjë nuk hyn dot po nuk pati leje. Kjo do të thotë se punonjësi, që ka vepruar me gjakftohtësi, sepse zarfet që ka prekur i ka mbyllur siç kanë qenë, të jetë punonjës i brendshëm i këtij ambienti”, tha kryetarja e komanduar e Gjykatës së Krimeve të Rënda, Etleva Deda, e cila kërkon zgjatjen e mandatit nga KLD. Ajo pohon se qëllimi i keqbërësve ka qenë sabotimi i punës së gjykatës dhe jo përfitimi. “Është vepruar me gjakftohtësi. Nëse donte të përvetësonte, mund të merrte sende me vlerë. Nuk ka qenë qëllimi të përvetësojë pasurinë e ndodhur aty, por të sabotojë punën e gjykatës”, thotë kryetarja. Duket se vjedhja në këtë gjykatë do të ndikojë edhe në votimin e anëtarëve të KLD-së për kryetarin e ri të Krimeve të Rënda, i cili është një nga më të lakmuarit e sistemit gjyqësor. Në garë janë disa gjyqtarë aktualë të Krimeve të Rënda, krahas Dedës, e cila zuri vendin e lënë bosh nga Dritan Halluanj, i cili fitoi të drejtën për të qenë anëtar i KLD-së.

Videoregjistrimi “Meta-Prifti”, prokuroria, deklarata e BE-së? Të merret parasysh nga gjykata
2011-11-10

Procesi

Prokuroria i sugjeron gjykatës që të kërkojë ekspertizë europianëve

Prokuroria e Përgjithshme i sugjeron Gjykatës së Lartë që të dëgjojë deklaratat zyrtare të Bashkimit Europian për rikryerjen e ekspertimit të videos “Meta-Prifti” në një vend perëndimor, pasi konkluzionet e tre shqiptarëve nuk janë të sakta. Ideja e ish-ministrit të Ekonomisë, Dritan Prifti, njëherazi personi që pohon se ka kryer këtë video, se ekspertimi i pajisjeve që ka dorëzuar në prokurori duhet të këqyret nga policitë europiane, është komentuar dy ditë më parë nga zyrtarët e Bashkimit Europian. Këta të fundit janë shprehur të gatshëm që të ofrojnë ekspertizë për këtë videoregjistrim, nëse e kërkojnë autoritetet shqiptare. Gazeta “Shqip” ka pyetur zyrtarët e Prokurorisë së Përgjithshme, të cilët kanë pohuar se janë të gatshëm që të pranojnë kryerjen e ekspertimit të videos në një vend europian. Ata pohuan se kanë kërkuar me ngulm që ekspertimi i videos të bëhet nga ndërkombëtarët, pra nga ekspertët e huaj, pasi në vend nuk ka persona apo studio të licencuara për të tilla ekspertime. Gjatë zhvillimit të seancave gjyqësore, prokurori Bujar Sheshi, pas rrëzimit të ekspertizës të ekspertit nga SHBA-ja, pohoi se riekspertimi i kësaj videoje dhe provave nuk duhet të kryhet në Shqipëri. Prokurori tha se ka kontaktuar me të gjitha institucionet në Shqipëri dhe nuk kishte asnjë person që mund të kryente këtë ekspertim. Ndryshe mendoi gjykata që caktoi tre “shkencëtarët” shqiptarë, të cilët, megjithëse pranonin se nuk kishin njohuri dhe pajisje, i dhanë përgjigje pyetjeve të gjykatës. Prokuroria këmbëngul se kryerja e ekspertimit duhet të kryhet nga ekspertët e huaj, pasi në këtë mënyrë nuk mund të paragjykoheshin nga palët në proces. Sipas akuzës, deklarata nga zyrtarët e BE-së duhet të dëgjohet nga Gjykata e Lartë, e cila më parë do të dëgjojë pretendimet e prokurorisë dhe avokatëve për ekspertizën e tre shqiptarëve.

Dy ditë më parë, BE-ja doli në një prononcim për Shqipërinë dhe pohoi: Komisioni pret që sistemi shqiptar të veprojë në mënyrë tërësisht të pavarur dhe në një mjedis të paanshëm. Kjo do të thotë se ne presim që gjyqësori të kërkojë ekspertizën e nivelit më të lartë të mundshëm dhe nëse ekziston nevoja, ne presim që gjyqësori, në kuadër të bashkëpunimit legal me partnerët ndërkombëtarë, të kërkojë këshilla në nivel ndërkombëtar me partnerët jashtë vendit.

Minatorët e papaguar prej 4 muajsh shkarkojnë kreun e sindikatës
2011-11-10

Bulqizë

Puna në galeritë e kromit nuk ka nisur ende, pas aksidentit që ndodhi më 18 tetor

Rreth 700 minatorë të Bulqizës vazhdojnë të jenë pa punë dhe pa rroga, edhe pse ka kaluar më shumë se një muaj që nga ndërprerja e grevës së përgjithshme. Strukturat e Ministrisë së Ekonomisë nuk kanë dhënë ende leje për rifillimin e punës, ndërkohë që pritja e gjatë dhe rëndimi i gjendjes ekonomike të minatorëve ka shkaktuar çarje në sindikatën e minierës. Kështu, në fillim të javës, në një mbledhje të jashtëzakonshme, këshilli sindikal i minierës ka shkarkuar nga detyra kreun e sindikatës, Dilaver Përkoxha.

Rokadë në sindikatë

Disa ditë më parë u bë shkarkimi i kryetarit të sindikatës së minierës, Dilaver Përkoxha dhe në vend të tij është zgjedhur Kujtim Alliu. Ky ndryshim është shoqëruar me replika të forta dhe akuza të ndërsjella. Ish-kryesindikalisti Përkoxha është akuzuar nga sindikalistët minatorë se, ishte “afruar” së tepërmi me drejtuesit e minierës dhe nuk ka qenë këmbëngulës në mbrojtjen e të drejtave të tyre. Duket se kjo gjë ka çuar edhe në zëvendësimin e tij, në mbledhjen e jashtëzakonshme të zhvilluar në fillim të javës. Ndërkohë, ish-kryesindikalisti Përkoxha e ka quajtur të papritur dhe të padrejtë zëvendësimin e tij në krye të sindikatës së minatorëve.

Ende pa punë

Miniera e Bulqizës nuk prodhon ende asnjë kilogram krom. Inspektorët e Repartit të Inspektim Shpëtim Minierave (RISHM), të cilët u futën në galeri për të inspektuar të gjitha frontet e niveleve të minierës pas aksidentit të ndodhur më 18 tetor, ende nuk kanë nxjerrë konkluzione. Për këtë arsye, nga ana e Ministrisë së Ekonomisë, Tregtisë dhe Energjetikës nuk ka dalë urdhri i shumëpritur për rifillimin e punës. Drejtori i kësaj miniere, Medat Zogu shprehet se: “Ne vazhdojmë të mbetemi në pritje të këtij akt-zhbllokimi për të rinisur sa më parë punën në minierë”. Drejtori i RISHM-it, pas aksidentit konfirmoi se, miniera e Bulqizës do të rehabilitohet sipas një projekti të ri ku mendohet të punohet deri në nivelin e 23-të. Ekspertët e RISHM gjykuan se në aksident ka ndikuar edhe mbyllja e minierës si pasojë e protestës dhe grevës tremujore të minatorëve. Prokurorët ndërkohë po hetojnë shpërthimin dhe pritet të japin versionin përfundimtar mbi shkaqet dhe shkaktarët e aksidentit.

Vrasja e Arjan Selimit, prokuroria kthen në polici dosjen për zbulim autori
2011-11-10

Hetimi

Nuk ka ende asnjë të dyshuar për një nga ngjarjet e bujshme në kryeqytet

Vrasja e Arjan Selimit vazhdon të mbetet pa autor. Kur kanë kaluar rreth gjashtë javë nga ngjarja, prokuroria dhe policia nuk kanë asnjë të ndaluar apo të arrestuar, ndërsa po vijojnë të verifikojnë të gjitha pistat hetimore, që kanë qenë të shumta. Burime nga Prokuroria e Tiranës thanë dje se, po presin rezultatet nga oficerët e policisë gjyqësore që janë ngarkuar për “zbulimin e autorëve”, duke pohuar se dosja ndodhet në polici. Pas ngjarjes së 26 shtatorit, policia kreu disa shoqërime dhe mori në pyetje të afërmit e viktimës. Më pas, dosja kaloi në prokurori për verifikime të mëtejshme, megjithëse organi i prokurorisë nuk mundi dot të zbardhë vrasjen e 26 shtatorit. “U kryen të gjitha veprimet hetimore, nga rikëqyrja e vendit të ngjarjes e deri tek ekspertiza e gëzhojave të gjetura në vendin e ngjarjes. Janë marrë në pyetje personat që e kanë shoqëruar viktimës para ngjarjes. Megjithëse kanë pohuar se kanë parë persona të dyshimtë afër vendit të ngjarjes, asnjë prej tyre nuk ka njohur të dyshuarit”, - pohojnë burimet nga prokuroria, të cilat saktësojnë se presin rezultate konkrete nga Policia e Tiranës.

Kjo e fundit ka dhënë pak detaje nga hetimet për vrasjen e Selimit, që ishte dënuar më parë për akuzën e trafikut ndërkombëtar të lëndëve narkotike. Sipas saj, 37-vjeçari është qëlluar me 20 plumba, në bazë të gëzhojave të gjetura në vendin e ngjarjes. “Është vrarë me armë zjarri shtetasi Arjan Selimi (Armand Andoni), 37 vjeç, banues në rrugën ‘Stavri Themeli’, Tiranë, i proceduar më parë për ‘trafikim të lëndëve narkotike’”, - thuhej në komunikimin e Policisë së Tiranës. Sipas saj, ngjarja ka ndodhur rreth orës 19:20 të datës 26 shtator, në vendin pranë ish-Parkut të Autobusëve. Trupi u gjet poshtë pallatit 8-katësh të banesës. Dyshohet se Arjan Selimi ka tentuar të hipë në një automjet në momentin që është sulmuar me armë nga dy persona, kur po dilte nga banesa në rrugën “Stavri Themeli”. Në vendngjarje janë gjetur 20 gëzhoja model 56.

Masakra e 7 gushtit, Dajti kërcënon prokurorin
2011-11-10

Gjyqi

Dritan Dajti, personi i akuzuar për vrasjen e katër punonjësve të Policisë së Shtetit më 7 gusht 2009, ka kërcënuar dje prokurorin e çështjes, Eugen Beçi, gjatë zhvillimit të seancës gjyqësore. Pas këtij episodi, gjykata ka urdhëruar nxjerrjen nga salla të të pandehurve Dajti dhe Xhoxhi. Burime nga gjykata thanë se gjithçka ka ndodhur dje rreth në orën 16:00, kur po pyetej para togave të zeza Arjan Muça, ish-drejtori i hetimit të krimit të organizuar, njëherazi shefi i operacionit për arrestimin e Dajtit, tashmë me detyrën e këshilltarit të Drejtorit të Përgjithshëm të Policisë. Në fillim të seancës, gjykata i kërkoi Dajtit të mos bëjë pyetje që nuk kanë lidhje me hetimin. Pas përsëritjes së pyetjeve nga i pandehuri, gjykata i ndërpreu fjalën. Pas kësaj, gjykata iu drejtua të pandehurit tjetër, Xhoxhi, nëse ka pyetje. Në këtë kohë, Dajti i kalon fletoren ku kishte përgatitur pyetjet për Muçën. Prokurori ka kërkoi nga gjykata që të mos lejojë Xhoxhin të bëjë pyetje bazuar në fletoren e Dajtit. Kërkesa u pranua, duke bërë që Dajti të acarohet të kërcënojë në sallën e gjyqit prokurorin Beçi.

Një ditë më parë, një tjetër prokuror i Krimeve të Rënda është kërcënuar në sallën e gjyqit. Anton Martini, në momentin që po lexonte konkluzionet për të pandehurit e të ashtuquajturës “Bandës së Mirditës”, u kërcënua nga Nikollë Syziu me fjalët: “Qoftë i madh Zoti te kalamajtë e tu, ta shof drejtësinë. Tjetër s’kam ç’të të them unë ty”. Prokurori iu përgjigj se nuk kishte frikë nga mallkimet e tij.