Ata janë të dy imazhe të përditshëm të ekranit në News24. Ajo u thotë çdo ditë ‘Mirëmëngjes’ shqiptarëve kudo që ndodhen drejpërsëdrejti nga “Vila24”, ndërsa ai veç studios së lajmeve, drejton takimin e mbrëmjes dhe debatin politik që zhvillohet mes liderve dhe personaliteteve të ndryshëm. Eneida Xhelili dhe Denis Minga kanë nisur kështu dje në mbrëmje maratonën një mujore të Botërorit 2010 në News24. Një eksperiencë krejt ndryshe për ta, sa e bukur aq edhe interesante që i bashkon në një format të veçantë dhe të pa aplikuar më parë në televizionet shqiptare, pasi të ftuarit e kësaj hapësire televizive do të jenë vetëm FEMRA. Të dy janë të këndshëm por edhe tifozë me preferencat e tyre përkatëse sa i takon skuadrave. Në këtë intervistë për ‘Bluetooth’, ata rrëfejnë emocionet, jashtë punës së përditshme që i kemi parë çdo ditë të bëjnë.
Eneida, në një tjetër format televiziv. Tashmë në emisionin sportiv. Sa e gjen veten?
Nuk është një eksperiencë e re për mua. Një format i ri për shikuesit por jo për mua. Kam qenë drejtuese edhe e emisioneve të tjera sportive, kjo ka lidhje shumë edhe me pasionin tim për futbollin të cilin e kam ndjekur që e vogël në familjen time. Besoj se shikuesit do të kenë mundësi të shohin diçka më të freskët dhe dinamike, larg kornizave të zakonshme. Besoj që me kolegun Denis Minga do të jemi një dyshe simpatike për sytë e shikuesve.
Do ju thuash ‘mirëmëngjes’ dhe ‘natën e mirë’ shikuesve të News24, pasi mesa dimë nuk do të shkëputesh nga “Vila24”, emisioni i mëngjesit….?
Më pëlqen që do të shtohen përshëndetjet e mia në orare të ndryshme të ditës, shpresoj që shikuesit e News24 ta fillojnë ditën me mua dhe ta mbyllin po me mua. Sigurisht impenjimi dhe lodhja do të jenë më të mëdha por edhe kënaqësia besoj gjithashtu. Emisioni do të ketë një format ndryshe nga të tjerët, kështu që besoj se shikuesi do të na zgjedhë ne.
Si do ta shohim Eneidën në emision? Një tjetër look apo imazhi nuk do të pësojnë ndryshime?
Mendoj që gjithçka do të jetë surprizë por në fund të fundit do jetë po Eneida në ekran pa dalë nga vetja. Do të shihet një Eneidë më sportive ku pamja është e rëndësishme por jo primare. Besoj që për çdo person të ekranit, profesionalizmi është më i rëndësishmi.
Thatë që jeni një ndjekëse e sportit. Ju vetë me cilin ekip jeni tifoze?
Vetëm dhe vetëm me Brazilin. Ndoshta në ditën e parë mund të vishem edhe me të verdha, nuk i dihet. Përsa i përket kolegut Minga, shpresoj shumë të ketë një finale Brazil- Itali, ku ‘lufta’ të zhvillohet edhe në studio. Jemi të dy tifozë të ekipeve përkatëse.
Po përsa i takon lojtarëve? Preferencat e tua?
Unë preferoj më mirë një lojë efektive në grup sesa emrat e veçantë të lojëtarëve që shpesh herë bëhen dhe individualist duke prishur rezultatin. Kështu që nuk është se kam ndonjë të preferuar. Më vjen keq pak që Ronaldinjo nuk luan me Brazilin, domethënë trajneri Dunga nuk e ka grumbulluar, por mendoj që kjo gjë është parë me një sy super profesionist.
Emisioni ka më tepër karakter femëror. Si do ta komentoje këtë zgjedhje, duke qenë se më shumë janë meshkujt ata që bëjnë më tepër debatin, tifon dhe komentin në ndeshjet përkatëse?
Kam përshtypjen që meshkujt duhet të mënjanohen kur janë përballë debatesh mes femrash. Mensoj që duhet të ruhen, përballë femrave që debatojnë (qesh). Është një zgjedhje e bukur, interesante që kanë bërë organizatorët e këtij programi dhe shpresoj që gjithçka të jetë nën kontroll.
Denis, një format krejt i veçantë? Si do ta përkufizoje?
Formati kësaj radhe është mjaft interesant. ‘Botërori ndryshe’, që do të thotë evenimenti më i madh i futbollit në botë, i parë në optikën e femrave. Ç’mendojnë gratë për botërorin, si e përjetojnë ato, si bëjnë tifo. Por padyshim do të ketë dhe surpriza të tjera që do t’i shihni vetë gjatë të gjitha ditëve te Botërorit.
Në një emision mes shumë femrave. Si ndihesh për këtë?
Është një emision krejt ndryshe nga ato që unë drejtoj e që lidhen kryesisht me politikën. Ndihem mirë. Por ka një të përbashkët, aktualitetin. Dhe kupa e botës është ngjarja më e madhe dhe më aktuale e këtyre ditëve dhe për ketë arsye nuk mund të mungonte në ekranin tonë.
Je një ndjekës i mirë i sportit. Me kë bën tifo në këtë botëror, cili është ekipi yt i preferuar?
Po, jam ndjekës i mirë i futbollit edhe pse herë pas here nuk na lë puna me lajmet, por mundohem që ndeshjet e mëdha t’i ndjek. Unë jam tifoz me Italinë . Këtë vit nuk mendoj se do të shkojmë shumë larg. Edhe vetë italianët duket sikur shkojnë për pushime dhe jo për të qenë një kandidat serioz për të rifituar kupën e botës. Megjithatë nuk duhet harruar fakti se sa herë italianët nisen jo favoritë, bëhen të rrezikshëm. Kështu që duhet të presim…
Përsa i takon lojëtarëve?
Lojtari më i mirë i këtij Botërori cilësohet Messi, ylli argjentinas. Megjithatë mendoj se më tepër ky mund të jetë Boterori i ekipeve sesa i individëve të veçantë.
Këtë herë në studio do të jeni me një partnere. Cilët do të jenë përqëndrimet tuaja gjatë emisionit dhe si do të zhvillohet ai në rreth 90 minuta?
Po do të jemi bashkë me Eneidën. Eshtë një eksperiencë e bukur për të dy dhe mendoj se gjithçka do të shkojë mirë. Emisioni është çdo ditë në orën 18.30 deri në orën 20.00 pra 90 minuta aq sa është dhe një ndeshje futbolli. Analizën e ndeshjeve kësaj radhe do ta bëjnë tifozet e pazakonta siç janë femrat. Futbolli është një sport shumë popullor dhe po fiton terren edhe në vendin tonë përsa i përket interesimit të grave. Shpresojmë që edhe ky shoë të jetë në funksion të kësaj risie. Do të të mungojë studio e lajmeve?
Padyshim, por mos harro që edhe Botërori përbën lajmin kryesor të këtyre ditëve.
Si e parashikon finalen e Botërorit?