Bogdani, publikohen fotot e dasmës madhështore

NAPOLI - Ndonëse ishte një dasmë madhështore, fotot e martesës së Erjon Bogdanit me modelen dhe juristen italiane Rosela Ariodante janë mbajtur sekret. “Bluetooth” sjell këtë herë fotografitë e kryera nën aparatin e një prej fotografëve më të mëdhenj në Itali, Carmine Napolitano, gjatë dasmës së sulmuesit shqiptar më 7 qershor në Napoli.

Albumi i Bogdanit me nusen e tij është konsideruar një nga më të bukurit e agjencisë “Nolano”, një prej më të njohurave në vendin përtej Adriatikut. Erjoni dhe Rosela shfaqen në det, në bukuritë e fshatrave italianë apo në mjedise intime.

Dasma e futbollistit të kombëtares shqiptare dhe e modeles së njohur italiane, ishte një prej më të përfolurave në verë, madje jo vetëm në Shqipëri.

Për Bogdanin, viti 2010 ka qenë një vit ndryshimesh të mëdha, duke nisur nga statusi në jetë, te ndryshimi i klubit nga Kievo te Çezena dhe së fundmi, tek fakti që ai ka rinisur të gjejë golat. Bogdani ka shënuar ndaj Milanit dhe ndaj Leçes, ndërsa tashmë ka ndryshuar edhe mënyrën e të festuarit, duke puthur gjithnjë unazën e martesës pas golave. “Është një dedikim edhe për nusen time”, thotë sulmuesi kuqezi.