Përplasja Basha-Topalli për fjalimin e lamtumirës

Berisha shmang Topin, por shtrëngojnë duart formalisht

Debatet e shumëpërfolura mes Kryetares së Kuvendit, Jozefina Topalli, dhe kreut të bashkisë, Lulzim Basha, shfaqen hapur në ceremoninë mortore të pretendentit për fronin mbretëror, Leka Zogu i Parë. Përplasjet mes tyre, sipas “Vizion Plus”, kanë ndodhur larg kamerave, në hollin e Parlamentit gjatë homazheve të zhvilluara për Leka Zogun I. Nga njerëzit e pranishëm mësohet se Kryetarja e Kuvendit, Topalli, ka shfaqur momente acarimi pasi mësoi se protokolli i shtetit kish caktuar kryebashkiakun Lulzim Basha të mbante nga Parlamenti fjalën e rastit, institucioni i ofruar nga Topalli për kryerjen e homazheve. Kreu i PLL-së, Ekrem Spahiu, ka qenë personi që ka ftuar kryebashkiaku Basha për të mbajtur fjalimin e lamtumirës. Kur kortezhi nisej drejt varrezave të Sharrës, kamera e “Vizion Plus” ka fiksuar disa momente pas debatit Topallit-Basha, ku ky i fundit këshillohet me zëvendësministrat e caktuar nga protokolli për organizimin e ceremonisë shtetërore për Leka Zogun I. Më herët përplasjet politike janë reflektuar edhe në qëndrimin mes Kryeministrit Sali Berisha dhe kreut të shtetit, Bamir Topi. Rastësia bëri që Berisha dhe Topi të shkëmbehen gjatë homazheve në shkallët e Parlamentit, por që të dy i janë shmangur takimit. Vetëm pas disa minutash ata i janë nënshtruar rregullave zyrtare ku kanë shtrënguar duart formalisht gjatë vendosjes protokollore. Topi ishte personi që i shtrëngoi duart Kryeministrit dhe bashkëshortes së tij. Presidentja kosovare, Jahjaga, ka qenë e detyruar t’i ndajë dy drejtuesit e lartë të shtetit, Topi dhe Berisha.