TIRANË- Dy fëmijët e kryeministrit Berisha, Shkëlzen Berisha dhe Argita Malltezi kanë paditur deputetin Sajmir Tahiri në Gjykatën e Tiranës duke kërkuar dëmshpërblim prej tij. Burime të gjykatës pohuan dje se secili nga fëmijët e kryeministrit Berisha kërkon katër milionë lekë të reja nga deputeti socialist. Në total Shkëlzen Berisha dhe Argita Malltezi kërkojnë tetë milionë lekë të reja nga deputeti.
“Çështja mban numrin 15724 dhe është regjistruar më datë tetë nëntor. Paditësit janë Argita Malltezi dhe Shkëlzen Berisha, i padituri, Sajmir Tahiri”-, thanë dje burimet zyrtare të Gjykatës së rrethit Tiranë. Sipas tyre, padia nuk është dorëzuar nga vetë fëmijët e kryeministrit Berisha, por nga përfaqësuesit e tyre ligjorë.
Padia në fjalë është administruar nga gjykata dhe është hedhur shorti elektronik, i cili ka zgjedhur gjyqtarin Ilir Çeliku për të shqyrtuar çështjen. “Paditësit kërkojnë detyrimin e të paditurit Saimir Tahiri ti shpërblejë paditëses Argita Malltezi dëmin pasuror dhe jopasuror në shumën 4 000 000 lekë. Detyrimin e të paditurit Saimir Tahiri ti shpërblejë paditësit Shkëlzen Berisha dëmin pasuror dhe jopasuror në shumën 4 000 000 lekë. Këto janë informacionet e vetme që mund t’ju japim”,- thanë burimet zyrtare të Gjykatës së Tiranës.
Ato sqaruan se seanca është caktuar më datë 9 dhjetor, ora 12:00. Ndërkohë deputeti Sajmir Tahiri, i kontaktuar nga gazeta “Shekulli” pohoi e nuk ka asnjë dijeni për këtë padi. “Nuk di asgjë, nga ju po e mësoj”,- tha dje deputeti. Pasi mësoi detajet e padisë, deputeti Tahiri pohoi se nuk kujtonte ndonjë rast të fundit kur ishte përplasur direkt me fëmijët e kryeministrit Berisha. “Le të bëjnë padi në gjykatë. Unë do shkoj dhe do e dëgjoj, por më shumë nuk di t’ju them gjë sepse nuk jam informuar”,- tha Tahiri.
Deputetët e dënuar nga gjykata
Ermonela Felaj
Në muajin qershor të këtij viti, deputetja e PS-së, Ermonela Felaj u dënua për shpifje me masën një milion lekë. Vendimi i Gjykatës u mor mbi bazën e deklaratave që ajo kish bërë për kompaninë “Ferar”.
Eduard Shalsi
Deputeti i PS, Eduart Shalsi, u dënua nga Gjykata e Tiranës me një milion lekë për shpifje ndaj deputetes së PD-së, Albana Vokshi. Gjykata dha vendimin në muajin korrik.
Sajmir Tahiri
Deputeti i PS-së u dënua nga Gjykata e Tiranës për shpifje ndaj deputetes së PD-së, Vokshi. Tahiri u dënua me 3.3 milionë lekë.
Artan Gaçe
Gjykata e Tiranes gjobiti me dy milionë lekë të reja deputetin e Partisë Socialiste, Artan Gaçe. Ai akuzohej se ka shpifur në ngarkim të koleges së tij demokrate, Albana Vokshi.