Allegri: Milan ka marrë veten

Objektivi i Milanit është të dalë i pari në grupin e tij të Ligës së Kampioneve, ku bën pjesë edhe Barcelona.

Për të arritur këtë, duhet fillimisht të merren tre pikët ndaj Bate Borisov të mërkurën në mbrëmje, në San Siro.

“Për të arritur vendin e parë në grup duhet të fitojmë ndaj Bates. Objektivi është vendi i parë sepse në këtë mënyrë do të ndeshemi me ekipet e dyta të grupeve në short”, shprehet Allegri, trajneri i kuqezinjve.

Për teknikun, ndeshja me Palermon e fituar 3-0 ishte “takimi që do të ndryshojë sezonin e Milanit”.

“Duhet të fitonim me Palermon dhe ia arritëm qëllimit. Reaguam dhe treguam se jemi pretendetë për titullin kampion. Ky është një muaj përcaktues si për Serinë A ashtu edhe për Ligën e Kampioneve. Duhet të nisim një seri rezultatesh pozitive”, thekson Allegri.

Përsa i përket formacionit, trajneri u shpreh se vetëm Abbiati është i sigurt se do të luajë.

“Seedorf dhe Thiago Silva kanë bërë stërvitje të diferencuar ditët e fundit. Ambrosini me shumë mundësi nuk do të jetë i disponueshëm. Pato është më mirë, por duhet të presim edhe pak ditë për ta parë sërish në fushë. Formacionin do ta vendos nesër”, tha trajneri i Milanit.