Shkodër e Bulqizë, atentate me tritol

Një shpërthim eksplozivi i telekomanduar ka plagosur rëndë kambistin Mark Gjoni, 50 vjec, në qytetin e Shkodrës.

Shpërthimi ka ndodhur në momentin kur i lënduari po lëvizte me makinën e tij për të shkuar në punë.

Ngjarja ka ndodhur mëngjesin e sotëm rreth orës 6 e 30 minuta në qendër të qytetit, pranë vendit ku ndodhen agjencitë e këmbimit valutor.

Shtetasi Mark Gjoni, që është dhe vëllai i një efektivi policie, ka qenë duke lëvizur i vetëm në automjetin e tij tip “Benz” me targë “SH 1465 E” dhe në momentin që është afruar pranë vendit të punës, makina e tij ka shpërthyer.

Kalimtarë të rastit e kanë nxjerrë 50-vjecarin me shpejtësi nga automjeti, duke e dërguar në spitalin rajonal të Shkodrës, ndërsa automjeti më pas është përfshirë nga flakët. Mësohet se i plagosuri ndodhet në gjendje të rëndë për jetën.

Shpërthimi i fuqishëm dhe më pas përfshirja e automjetit në flakë ka shkaktuar panik te banorët e zonës, duke rikthyer në vëmendje vrasjen e pak javëve më parë në qendër të Vlorës të gjyqarit Konomi, i cili u ekzekutua në mënyrë të ngjashme.

Policia në vendin e ngjarjes ka nisur hetimet dhe nga veprimet e para hetimore dyshohet se automjeti ka shpërthyer nga një sasi eksplozivi e aktivizuar në distancë nëpërmjet telekomandimit.

Ende nuk dihen as motivet dhe autorët e kësaj ngjarjeje të rëndë, ndërkohë që policia është duke intervistuar disa persona që kanë qenë dëshmitarë në shpërthimin e automjetit për të mësuar më shumë në lidhje me ngjarjen.

Bulqizë, shpërthim tritoli në një pallat

Ndërkohë, shpërthimi i një sasie tritoli ka tronditur mëngjesin e sotëm edhe qytetin e Bulqizës.

Sipas informacioneve të fundit, sasia e eksplozivit ka shpërthyer para derës së një apartamenti, për fat të mirë pa shkaktuar të lënduar.

Burime policore lokale njoftojnë se shpërthimi ka ndodhur para derës së banesës së shtetasit Adrian Durici, në katin e tretë të pallatit.

Të njëjtat burime shtojnë se agjentë të anti-krimit kanë nisur hetimet, duke marrë në pyetje edhe vetë shtetasin Durici.