“Kisha kohë që e kisha përgatitur veten për këtë vendim.”
Nuk ka qenë suprizë për vetë trajnerin Kuzhe largimi nga stoli i kombëtares shqiptare. Rezultatet e dobëta të njëpasnjëshme e kanë bërë teknikun kroat të ndërgjegjshëm se nuk mund të vazhdojë më në krye të pankinës shqiptare.
“U takova me presidentin Duka dhe vendosëm që të mos vazhdojmë më bashkëpunimin. Të dy palët menduam se kjo zgjidhje është më e mirë. Unë tashmë kam rrugën time, ndërsa Federata ka kohën e duhur për të gjetur trajnerin e ri. E ardhmja është sërish futbolli, kam dëshirë të punoj në ndonjë klub, por të shohim”, u shpreh Kuzhe.
“Të dy palët ramë dakord që një trajner tjetër do të ishte më mirë për edicionin e ardhshëm. Shpresoj që trajneri i ri të sjellë energji të reja në skuadër”, theksoi Duka.
Kuzhe ka drejtuar Shqipërinë në 13 ndeshje zyrtare me një bilanc prej 2 fitoresh, 4 barazimesh dhe 7 humbjesh; dhe në 11 ndeshje miqësore me një bilanc prej 6 fitoresh, 3 barazimesh dhe 2 humbjesh.
Kroati ka hyrë në historinë e kombëtares shqiptare si trajneri që ka arritur fitoren më të thellë në historinë e përfaqësueses sonë: 6-1 ndaj Qipros në një ndeshje miqësore të vitit 2009.