VIPAT adhurojnë VIPAT!

Anëtarët e estradës kosovare përpos që këndojnë vetë dhe synojnë publik, kanë edhe idhujt e tyre. Përderisa Agnesa Vuthaj adhuron Florin, Liberta Spahiu adhuron këngëtaren serbe Jelena Karlausa. Ka edhe margaritarë të tjerë
I kemi parë të luftojnë për adhurues, por nuk i kemi parë asnjëherë se kënd e adhurojnë.
Duke falënderuar Facebook.com dhe Twitter, sot adhuruesit e VIP-ve të Kosovës mund të shohin edhe shijen e estradës tonë.

Bukuroshja Agnesa Vuthaj – e cila në karrierë ka tentuar të bëjë të gjitha profesionet nga zëdhënësja deri në aktore – është një tifoze e madhe e Flori Mumajesit. Përpos kësaj, ajo dëgjon edhe Uriel, Xhoana, AIDA Baraku, Rihana, Korab Shaqiri, Rrezarta Shkurta e deri te Dafina Rexhepi.

Në profilin e saj Agensa shkruan se preferon të dëgjojë soft rok dhe soul, por kur shikon këngëtarët e lartshënuar, vështirë është që ndonjëri prej tyre të këndojë këtë zhanër muzike. Vuthaj ka edhe radiot e saj të preferuara, që janë Radioskandinavia.net dhe Radio Pandora. Duket i çuditshme gjithë ky kombinim apo jo?

Një këngëtare tinejxhere që po depërton në skenë kohëve të fundit e po ashtu këndon te Kënga Magjike, Beatrix Ramosaj në listën e këngëtarëve të preferuar ka Genta Ismajlin, Anxhelina Hadergjonaj, Zanfina Ismailin dhe natyrisht Beatrix Ramosajn, pra vetën!

Eh këngëtarja e muzikës popullore e shndërruar në ikonë të rezistencës ndaj kohës, Mihrije Braha pëlqen shumë Bilbilat, këngët popullore, por nuk ndalet me kaq. Në listën e dëshirave muzikore të saj gjenden edhe Teuta Kurti, Mirsa Kërqeli, Mariza Ikonomi, MC Kresha, Mehedin Pergjeqaj e deri te Maria Kizirian nga Armenia e largët. Çfarë përzgjedhjeje?! Pra, mos e harroni – Mihries i pëlqen edhe Meda.

Besoni apo jo, Dafina Zeqiri e pëlqen këngëtaren Remzije Osmani dhe grupin Metallica! Pak e çuditshme pasi që Dafina ka kopjuar stilet e të gjitha pop yjeve amerikane – ndoshta tash mendon ta kopjojë stilin e Metallica-s.

Kurse prezantuesja e emisionit “Prive” dhe e motit në Ora 7, Liberta Spahiu në listën e shijeve të saj ka edhe një këngëtare serbe. Ajo është Jelena Karleusa! Madje këngëtarja serbe është e para në listën e prezantueses së Klanit. Por, ajo dëgjon edhe Flektiza, TMM Records dhe Vegim.

Eh një këngëtare e re nga Shkodra, Ersida Mataj e adhuron Cecën, e cila hapur kishte dalë kundër shqiptarëve. Dihet sepse ajo është e veja e Arkanit. Këto janë ato që ne i dimë për momentin. Por, mos harroni, estrada di të fshehë shpesh shijen dhe në profilet në rrjetet sociale të qesë shijen e vet false.