Gazeta Shqip

Titujt e perditshem te gazetes Shqip

Përmendet rasti i “Top Channel”: Presione financiare e gjyqësore Ndryshe nga konkluzionet, progres-raporti i Komisionit Europian ka detajuar në mënyrë analitike problemet e Shqipërisë, duke dhënë qëndrimet për institucionet kryesore të vendit, ku janë vënë në pah problemet. Një nga çështjet që progres-raporti thekson, është edhe çështja e lirisë së medias, ku përmendet në veçanti rasti i “Top Channel”, si një fenomen ku qeveria përdor standarde të ndryshme me media të ndryshme.

Parlamenti

Progres modest është bërë në organizimin e procedurave të Parlamentit, që përfshin një numër amendamentesh për rregulloren e Kuvendit, disa prej të cilave flasin për fjalimet në kohën e lirë që duhet të bëhen në fund të seancës. Në mars të 2011-s, Parlamenti ngriti një komision hetimi për veprimtarinë e Kuvendit gjatë periudhës nga shtatori 2005 deri në dhjetor 2010. Komisioni mbajti një mbledhje përpara zgjedhjeve lokale në maj. Megjithatë puna e Parlamentit vazhdon seriozisht të dëmtohet nga ngërçi politike ndërmjet mazhorancës dhe opozitës, ku mungesa e dialogut dhe rritja e retorikës është ushqyer pas ngjarjeve të 21 janarit dhe zgjedhjeve të kundërshtuara lokale në Tiranë. Opozita përfundoi bojkotin e saj të gjatë më 5 shtator. Gjithsesi reforma zgjedhore, bllokimi politik dhe kontrolli i qeverisë mbetet i paefektshëm. Janë miratuar shumë amendamente të propozuara nga mazhoranca, duke përfshirë edhe masa disiplinore kundër anëtarëve të Parlamentit. Komisioni hetimor ndaj legjislativit nuk e ka marrë mandatin e ri për të zhvilluar analizat e tij, duke humbur kështu nga procedurat. Gjatë periudhës së raportuar kanë kaluar më shumë se 100 ligje. Megjithatë nuk janë miratuar ligjet prioritare që kërkojnë tre të pestat, të cilat qëndrojnë ende pezull. Në lidhje me administratën e Kuvendit është bërë shumë punë për të rritur kapacitetin e saj, por ende ka një mungesë të dukshme efektiviteti. Kjo ndodh nga politizimi që vjen si pasojë e mungesës së profesionalizimit dhe pavarësisë. Gjykata Kushtetuese vendosi që emërimi i anëtarëve të Gjykatës së Lartë dhe asaj Kushtetuese të bëhet me anë të bashkëpunimit të Presidentit dhe Parlamentit, seancat dëgjimore dhe procesi i votimit për dekretet presidenciale vazhdoi të shënohet nga politizimi dhe retorika konfrontuese.

8 maji

Zgjedhjet lokale, megjithëse vlerësohen si konkurruese e transparente nga OSBE/ODIHR, dëshmuan mungesën e besimit mes forcave politike dhe ndikuan tek administrata zgjedhore.

Incidente të dhunshme u panë gjatë fushatës elektorale, sipas progres-raportit, dhe pavarësisht përmirësimeve në listën e votueseve, vijojnë problemet që lidhen me saktësinë e tyre.

Në veçanti, përcaktimi i rezultateve të zgjedhjeve për kryetarin e Bashkisë së Tiranës, u shndërrua në një proces shumë të diskutueshëm dhe vendimet e Komisionit Qendror të Zgjedhjeve u morën sipas linjave partiake, në mungesë të arsyetimit dhe mospërputhjeve. Polemika politike dhe ligjore ndodhi gjithashtu gjatë shqyrtimit të ankesave nga Kolegji Zgjedhor, veçanërisht për Tiranën.

Qeveria

Hartimi i legjislacionit nga ministritë e linjës, duhet të bëhet sipas një pune përgatitore dhe konsultimeve të duhura.

Për këtë duhet të miratohen rregulla specifike dhe një transparencë në konsultimin e procesit legjislativ, për të cilat Shqipëria është angazhuar të adaptojë. Në këtë rast do të duhet të forcohet bashkëpunimi me shoqërinë civile. Duhet të riaktivizohen grupet e punës, të cilat nuk janë mbledhur që nga tetori i vitit 2010.

Administrata

Qeveria miratoi në qershor, sipas komisionit, planin e aksionit për 12 prioritetet, por me gjithë punën e Komisionit Parlamentar të Integrimit, ky plan veprimi nuk është miratuar ende nga Parlamenti. Reforma zgjedhore ka ngecur, ndërsa progresi në administratën publike është i kufizuar. Ngritja e një shërbimi civil të pavarur, profesional, të bazuar mbi merita dhe i lirë nga ndërhyrjet politike, nuk është përmbushur ende. Emërimi i Avokatit të Popullit ende nuk është bërë.

Gjyqësori

“Nuk ka pasur progres të mëtejshëm për sa i takon pavarësisë së gjyqësorit. Ka pasur shqetësime mbi ndërhyrjen jo të duhur apo pengim të hetimit të pavarur dhe ndjekjen e veprave të mundshme penale mbi zhvillimet e 21 janarit, ku u vërejt vdekja e 4 protestuesve”, theksohet në raport. Ekziston rreziku se vonesat e pajustifikuara dhe të vazhdueshme në procedura parandalojnë përmbushjen e parimit për një gjykim të drejtë, siç pasqyron Kushtetuta shqiptare.

Media

Ndonëse Gjykata e Apelit e rrëzoi gjobën masive të vendosur televizionit “Top Channel” për një rast që përfshinte një politikan të nivelit të lartë, aplikimi i parimit të proporcionalitetit të gjobave ndaj mediave apo gazetarëve nuk respektohet gjithmonë. Shqetësime ka pasur mbi një sërë çështjesh kur subjektet mediatike kanë folur për aplikim të njëanshëm të rregullave fiskale, presione financiare dhe paragjykim në procedurat gjyqësore. Ka pasur një rast dhunimi të një gazetari që u sulmua nga agresorë të panjohur, për arsye që raportohet se kishin të bënin me punën e tij. Pavarësia redaksionale vazhdon të pengohet nga interesat politike dhe ato të biznesit, që çojnë edhe në vetëcensurim. Asnjë masë nuk është marrë për të rritur transparencën e pronësisë së mediave.

Buxheti 2012, panik me euron Bode: Jemi treguar të kursyer
2011-11-10 Ard Kola

Debati në Kuvend, Malaj: Ekonomia, në rënie

Për mbi dy orë debate, mazhoranca dhe opozita kanë diskutuar mbi fatin ekonomik të vendit dhe ku me shqetësim të dyja palët kanë dalë me konkluzionin se e ardhmja mbetet e pasigurt. “Ajo që dimë me siguri është pasiguria për të ardhmen, nisur nga zhvillimet e fundit të Eurozonës”, tha Selami Xhepa, anëtari demokrat i Komisionit të Ekonomisë, kurse deputeti i PS-së, Arben Malaj, e argumentoi rënien ekonomike me një sërë faktorësh, që lidhen kryesisht me rritjen e kostos së borxhit dhe shkurtimeve të vazhdueshme në buxhet. Ministri i Financave pranon se dy vendet me të cilën Shqipëria kryen aktivitet të ngushtë ekonomik janë në një situatë tepër delikate dhe se e tërë Eurozona është duke përjetuar momente të pasigurta. “Për këtë arsye, ne kërkojmë që të merrni masa. Nuk është puna për të bërë shpikje, por thjesht të ruajmë deficitin. Këtë vit kishim merak Greqinë, ndërsa vitin tjetër na pret Italia”, iu përgjigj deputeti i PS-së, Malaj.

“Ndryshe nga vitet e kaluara, këtë herë, me konsultimin edhe të partnerëve ndërkombëtarë (FMN), paraqesim një buxhet më realist, konvertor, më të matur me shpenzimet, për shkak të kushteve që na imponohen nga faktorët e jashtëm”, tha ministri i Financave. Sipas Bodes, borxhi do të vijojë të qëndrojë jo më tepër se 60 për qind në raport me PBB-në, ndërsa deficiti do të ruhet në 3 për qind, nga 3.5 për qind që është këtë vit. Ministria pranoi se të ardhurat nuk janë në nivelin e duhur, se investimet e huaja direkte janë tkurrur, gjithashtu remitancat kanë pësuar ulje me 13 për qind, dhe ku deficiti i llogarisë korrente qëndron 2 pikë për qind mbi normën, por “megjithatë ne jemi optimistë se vitin tjetër, ekonomia do të karakterizohet nga një rritje prej rreth 4.3 për qind”, u shpreh kreu i Financave. Bode analizoi gjerë situatën ekonomike në vend, duke u ndalur në sektorë të veçantë, ndërsa garantoi se rritja ekonomike do të bazohet te modeli i brendshëm dhe te forca e eksporteve.

Ndryshe nga herët e kaluara, opozita nuk drejtoi asnjë pyetje, por u mjaftua me dhënien e komenteve. Kryefjala e diskutimit ishte borxhi dhe shërbimet ndaj tij.

"Është momenti, do ta marrim këtë përgjegjësi apo jo? Ose mbahet nën kontroll situata në këtë vit, ose do të ndiheni edhe ju në pamundësi reale, për shkak të presionit elektoral, që financat vijnë e përkeqësohen”, tha Malaj. Ish-ministri socialist i Financave mendon se buxheti i viti të ardhshëm nuk është realist dhe mund ta rrisë borxhin në kushtet kur Shqipëria po rrethohet nga kriza e përkeqësuar e Eurozonës. Ndaj ai mbron idenë e një ndërhyrjeje të dyanshme, që nuk prek vetëm shpenzimet, por edhe taksat.

Kreu aktual i Financave shton faktin tjetër se, nëse Shqipëria po qëndron stabël me borxh nën 60 për qind, vendet e rajonit e kanë rritur në tre vitet e fundit me 20 për qind. Gjithnjë te pjesa e huasë, ministri pranoi edhe faktin tjetër se gjysma e investimeve do të realizohet përmes huamarrjes dhe se në këtë pikë, nuk ka asgjë të keqe. “Flisni sikur të ishit në kohën e Enver Hoxhës. Bota po mbahet me borxhe dhe riskedulimi i tyre është një proces normal. Të njëjtën veprim kryem edhe me eurobondin”, iu përgjigj ministri deputetëve të opozitës. Por Malaj nuk e la me kaq. “O zoti ministër, duhet të kuptosh një fakt, që nëse sot krenohesh me borxh të ulët, shërbimet ndaj tij do të të rriten mjaft vitin tjetër, sikurse i ndodhi shumë vendeve të BE-së, akoma e më të zhvilluara se ne”, tha Malaj.

Totali i të ardhurave parashikohet në nivelin e 355.8 miliardë lekëve, me rritje prej 7.9 përqindësh kundrejt të ardhurave të pritshme për vitin 2011, ose në nivelin 25.6 për qind të PBB. Në këtë parashikim, ministria është treguar më objektive, duke ndjekur këshillat e FMN-së, pasi në të kaluarën skenarët flisnin për arkëtime në rritje mbi 10 për qind. Sa i takon investimeve, për vitin 2012 parashikohen në masën 69.7 miliardë lekë, ose mbi 10 miliardë lekë më pak se i vitit 2011.

BE sjell ultimatumin për statusin kandidat. Sot pritet konsensusi PD-PS
2011-11-10 Fatjona Mejdini

Brukseli

Drejtori i Përgjithshëm i Zgjerimit, Stefano Sanino takohet me Topin, Topallin dhe Ramën. Sot, radha e Berishës

Komisioni Europian kërkon me çdo kusht që Shqipëria të ecë përpara në rrugën e integrimit në BE dhe të kapë “stacionin” e dhjetorit. Pas 20 ditëve nga vizita e fundit në Shqipëri, Drejtori i Përgjithshëm për Zgjerimin në Bashkimin Europian, Stefano Sanino u rikthye dje në Tiranë për të zhvilluar një tjetër tur takimesh me drejtuesit kryesorë politikë në vend, për t’iu kërkuar konsensus në përmbushjen e 12 rekomandimeve që iu janë lënë detyrë shtëpie për integrimin. Takime, dje, në kuadër të nevojës së konsensusit Sanino zhvilloi me kreun e shtetit, Bamir Topi dhe kryetarin e opozitës, Edi Rama. Sot ai do të zhvillojë një takim me kryeministrin Sali Berisha, nisur nga fakti se dje, kreu i qeverisë ishte në një vizitë zyrtare në Maqedoni. Por, vizita e Saninos shoqërohet edhe me lajmin e keq se kriza ekonomike ka sjellë një ngadalësim të procesit të zgjerimit në BE. Këtë qëndrim e konfirmoi vetë Drejtori i Përgjithshëm për Zgjerimin në KE, Sanino gjatë një interviste në radion gjermane, ‘Deutsche Ëelle’. Kjo sjell nevojën për një pakt kombëtarë nga ana e Shqipërisë, sepse vendi nuk e ka më luksin të humbë asnjë minutë kohë drejt destinacionit Europë.

Mesazhi

Zyrtari i lartë i Komisionit për Zgjerim në BE, Stefano Sanino ka shpërndarë tek drejtuesit politikë në vend, nevojën e Shqipërisë për t’i treguar seriozitet Europës dhe për ta shfrytëzuar mundësinë e marrjes së statusit të vendit kandidat në dhjetor. Ky qëndrim u vu re gjatë takimit që Sanino zhvilloi me kreun e shtetit, Bamir Topi. Sipas zyrës së shtypit të Presidencës, biseda mes Topit dhe Saninos “u përqendrua kryesisht në situatën aktuale politike dhe institucionale në vendin tonë”, duke nënkuptuar këtu faktin se kriza politike duhet të mbyllet dhe nevoja për të mos humbur kohë me integrimin. Presidenti i Republikës, Topi deklaroi nga ana e tij se, kishte bindjen se klasa politike në vend do të niste së shpejti bashkëpunimin. Sipas Topit, klasa politike në vend nuk mund të mbajë më peng aspiratat e shqiptarëve për të qenë pjesë e Europës. “Bashkëpunimi ka qenë dhe thelbi i mesazheve dhe apeleve të tij të vazhdueshme publike, duke ritheksuar se e ardhmja europiane e shqiptarëve dhe përmbushja e aspiratës së këtij populli për të qenë pjesë e familjes europiane nuk duhet të vihet më në pikëpyetje nga mosmarrëveshjet e brendshme politike”, - citohet të ketë thënë Topi. Një takim Sanino zhvilloi edhe me kryetarin e PS-së, Edi Rama. Burime pranë këtij takimi bënë të ditur për gazetën se, gjatë këtij takimi, zyrtari i lartë i BE-së kërkoi të dinte qëndrimin e PS-së se pse nuk po ecej përpara me procesin e integrimit. Konkluzionet, sipas përfaqësuesve të PS-së për këtë proces, pritet të bëhen sot nga Sanino. Sot zyrtari i KE-së pritet të zhvillojë një takim me kryeministrin Sali Berisha, si pasojë e faktit që dje kreu i qeverisë nuk mund të ishte i pranishëm në Tiranë, për shkak të një vizite zyrtare në Maqedoni. 
Rreziku

Për të rritur presionin tek klasa politike shqiptare, duket se Drejtori i Përgjithshëm i Zgjerimit në KE, Stefano Sanino deklaroi për radion gjermane “Deutsche Ëelle” se, procesi i anëtarësimit të vendeve të reja po bëhet gjithnjë e më i komplikuar, pjesërisht kjo edhe për shkaqe politike. Por nga ana tjetër, Sanino la të kuptohej se dhe kriza ekonomike në Europë ndikonte në këtë situatë. Në këtë kuadër, Sanino mori si shembull Kroacinë, duke theksuar se këtij vendi iu desh të kalonte një rrugë më të vështirë se sa e vendeve të tjera të Lindjes apo Ballkanit që u anëtarësuan përpara saj. Në këtë kuadër, zyrtarët europianë e quajnë një shans shumë të madh mundësinë që ju dha Shqipërisë për të marrë statusin e vendit kandidat në BE në muajin dhjetor, pas dy humbjeve të kësaj mundësie.

Shullazi lëvizte me makinë të Kuvendit
2011-11-10

Hetimet

Mjeti ku u kap 33-vjeçari me shokun e tij, Gilmando Dani, i përket Kuvendit të Shqipërisë

Emiljano Shullazi dhe shoku i tij, Gilmando Dani, të cilët janë arrestuar për armëmbajtje pa leje, janë kapur në një makinë të Kuvendit të Shqipërisë. Zyrtarisht, policia nuk ka dhënë detaje për mjetin e bllokuar, brenda të cilit udhëtonin dy personat, kontingjente kriminalë, dhe u gjetën armë e maska. Skandali duket se është mbyllur në heshtje, ndërkohë që një nga dy të arrestuarit pritet të lirohet, pasi shoku ka marrë përsipër pronësinë e një pistolete pa leje të gjetur në mjet.

Emiljano Shullazi, 33 vjeç dhe Gilmando Dani, 32 vjeç, u kapën dy net më parë gjatë një kontrolli të ushtruar nga Komisariati nr. 2 në Tiranë, ndërkohë që paraditen e djeshme, policia e kryeqytetit ka nxjerrë disa detaje nga operacioni për arrestimin e tyre. Sipas të dhënave zyrtare, arrestimi i këtyre shtetasve u realizua rreth orës 19.30 të së martës, në kryqëzimin me rrugën “Kongresi i Lushnjës”, në Tiranë. Menjëherë u mor informacion dhe u ushtrua kontroll i imtësishëm, kur ata po qarkullonin me automjetin tip “Benz“, me targa TR 2703 L. “Gjatë kontrollit në mjet u gjet një pistoletë tip ‘Glock’, me një krehër me 16 fishekë, maska të zeza si dhe disa celularë. Aktualisht në ngarkim të shtetasve të lartpërmendur vazhdon puna hetimore në bashkëpunim me prokurorinë, për aktivitetin dhe tendencat e tyre kriminale”, -deklaroi zyrtarisht policia. Ndërkohë, materialet hetimore të përpiluara në ngarkim të tyre i kaluan Prokurorisë së Tiranës, për konsumim të veprave penale “prodhimit dhe mbajtje pa leje të armëve luftarake”.

Ndërkaq, nga hetimet e para ka rezultuar se mjeti i sekuestruar është në pronësi të Kuvendit të Shqipërisë. Madje, edhe leja e qarkullimit është në emër të Kuvendit. Megjithatë, burimet policore shpjegojnë se mjeti mund të jetë shitur në ankand nga Kuvendi i Shqipërisë, por edhe në këtë rast, problemi qëndron se si ka rënë në dorën e tyre dhe pse nuk ishte tërhequr leja e qarkullimit. Nëse çdo punonjës policie do të kërkonte të verifikonte këtë mjet, do të rezultonte se është në pronësi të Kuvendit, ndërkohë që në makinë mbahej edhe një kundërtabelë, për të shmangur uniformat blu. Kjo po verifikohet nga grupi hetimor, ndërkohë që mjeti mbetet i sekuestruar në ambientet e Drejtorisë së Policisë së Tiranës.

Nga ana tjetër, grupi hetimor vuri në dukje se një nga dy të arrestuarit mund të lirohet, dhe gjasat janë për Emiljano Shullazin. Sipas të dhënave, në mjet është gjetur vetëm një pistoletë, e cila bie në kundërshtim me Kodin Penal, por ajo është gjetur poshtë sediljes së Gilmando Danit. Në këto kushte, dyshimet më të tepërta për këtë armë bien mbi Danin, i cili do të përballet në gjykatë sot ose nesër, pasi aktualisht është i arrestuar bashkë me Shullazin. Kjo nuk është hera e parë që dy shokët janë arrestuar bashkë nga policia. Ata njihen nga strukturat e hetimit të krimit për vepra penale të ndryshme. Ndërkohë, ndaj Danit, disa muaj më parë ka pasur edhe një atentat, gjatë të cilit mbeti i plagosur dhe deri më sot policia nuk ka mundur të gjejë autorin e krimit.